Pep Guardiola, þjálfari Barcelona, vann í gær sinn ellefta titil sem þjálfari félagsins og jafnaði þar með metið sem Hollendingurinn Johan Cruyff átti einn áður. Barcelona tryggði sér þá sigur í spænska Ofurbikarnum með 3-2 sigri á erkifjendunum í Real Madrid í seinni leik liðanna en þeim fyrri lauk með 2-2 jafntefli í Madrid.
Johan Cruyff vann ellefu titla með Barcelona á árunum 1988-1996 en leikmaðurinn Josep Guardiola fékk einmitt tækifærið hjá Cruyff á sínum tíma og vann tíu af þessum ellefu titlum sem Barcelona vann í tíð Cruyff.
Guardiola er aðeins á sínu fjórða tímabili með Barcelona sem gerir afrek hans enn glæsilegra. Barcelona hefur unnið spænska meistaratitilinn öll árin, Meistaradeildarinnar tvisvar á þremur árum og vann nú Ofurbikarinn þriðja árið í röð.
Guardiola gæti bætt við tveimur fleiri titlum áður en árið 2011 er liðið því framundan er leikur um Ofurbikar UEFA við Porto (Mónakó 26. ágúst) og þátttaka í Heimsmeistarakeppni félagsliða í Japan í desember.
Titlar Barcelona undir stjórn Pep Guardiola:
Spænska deildin 3 (2009, 2010, 2011)
Spænski bikarinn 1 ( 2009)
Spænski ofurbikarinn 3 (2009, 2010, 2011)
Meistaradeild Evrópu 2 (2009, 2011)
Ofurbikar UEFA 1 (2009)
Heimsmeistarakeppni félagsliða 1 (2009)
Titlar Barcelona undir stjórn Johan Cruyff:
Spænska deildin 4 (1991, 1992, 1993, 1994)
Spænski bikarinn 1 (1990)
Spænski ofurbikarinn 3 (1991, 1992, 1994)
Evrópukeppni Meistaraliða 1 (1992)
Evrópukeppni félagsliða 1 (1989)
Ofurbikar UEFA 1 (1992)
Fram
FH
