Var í sms-sambandi við móður sína allan tímann

„Mamma, segðu lögreglunni að flýta sér. Fólk er að deyja hérna!". Svo hljóðar fyrsta sms-skeytið sem hin sextán ára gamla Julie Bremnes sendi móður sinni frá Útey síðastliðinn föstudag.

Öll sms-samskipti mæðranna hafa verið birt á vef Verdens Gang, en Julie faldi sig bak við kletta á eyjunni og komst þannig lífs af.

Julie hringdi fyrst í móður sína og sagði henni að brjálaður maður væri að hleypa skotum af byssu, en mamma hennar bað hana að senda sér sms á fimm mínútna fresti svo hún gæti vitað að hún væri enn á lífi.

Einn klukkutími og tuttugu mínútur liðu frá fyrsta skeyti Julie til mömmu sinnar, til þess síðasta.



Sms-sendingarnar í heild sinni:

Julie: „Mamma, segðu lögreglunni að flýta sér. Fólk er að deyja hérna!"

Móðir hennar: „Ég er að vinna í því, Julie. Lögreglan er á leiðinni. Þorirðu að hringja í mig?"

Julie: „Nei"

Julie: „Segðu lögreglunni að það sé brjálaður maður hérna sem hleypur um og skýtur fólk"

Julie: „Þau verða að flýta sér!"

Móðir hennar: „Lögreglan veit það og þau hafa fengið margar tilkynningar. Þetta gengur ágætlega, Julie. Lögreglan er að hringja í okkur. Láttu okkur vita að þú sért á lífi á fimm mínútna fresti, gerðu það?"

Julie: „Ok"

Julie: „Við erum dauðhrædd!"

Móðir hennar: „Ég skil það vel, stúlkan mín. Haltu þig í skjóli, ekki hreyfa þig neitt! Lögreglan er nú þegar á leiðinni, ef hún er ekki þegar komin! Sérðu slasaða eða dauða?"

Julie: „Við erum í felum í klettunum meðfram ströndinni."

Móðir hennar: „Gott! Á ég að biðja afa að koma og sækja þig þegar allt verður öruggt aftur? Við getum gert það."

Julie: „Já"

Móðir hennar: „Við höfum samband við afa undir eins."

Julie: „Ég elska þig, þó svo ég gargi kannski stundum á þig :-*"

Julie: „Og ég örvænti ekki, þó ég sé skíthrædd."

Móðir hennar: „Ég veit það, stelpan mín. Okkur þykir líka ótrúlega vænt um þig! Heyrirðu ennþá skothvelli?"

Julie: „Nei"

Móðir hennar: „Hefurðu eitthvað heyrt frá hinum frá Troms? Afi er á leiðinni suður."

Julie: „Lögreglan er hérna"

Móðir hennar: „Maðurinn sem er að skjóta er víst klæddur í lögreglubúning. Farðu varlega! Hvað verður um þig núna?"

Julie: „Við vitum það ekki"

Móðir hennar: „Geturðu talað núna?"

Julie: „Hann skýtur enn!"

Móðir hennar: „Jørgen synti í land. Ég talaði við pabba hans."

Móðir hennar: „Þetta er út um allt í fréttunum núna, öll athygli á Útey núna. Farðu varlega! Þegar þú getur, komdu þér á meginlandið og komdu með afa til Hamars."

Julie: „Ég er enn á lífi."

Móðir hennar: „Og guði sé lof fyrir það."

Julie: „Við bíðum eftir að vera sótt af lögreglunni."

Julie: „Við heyrðum skothvelli, svo við þorðum ekki að fara upp."

Móðir hennar: „Gott! Þeir segja í sjónvarpinu að verið sé að flytja fólk af eyjunni núna."

Julie: „Við vonum að við verðum sótt af einhverjum fljótt. Geta þau ekki náð honum bráðum?!!"

Móðir hennar: „Hryðjuverkalögreglan er þarna, og þeir eru að vinna að því að ná honum."

Julie: „OK"

Móðir hennar: „Eigum við að reyna að kaupa flugmiða heim á morgun?"

Julie: „Ég hef ekki tíma til að hugsa um það núna."

Móðir hennar: „Ég skil það"

Julie: „Veistu eitthvað hvort þeir hafi náð honum?"

Móðir hennar: „Ég læt þig vita, stelpan mín. Við fylgjumst stanslaust með sjónvarpinu."

Móðir hennar: „Hæ, ertu þarna?"

Julie: „Já, þyrlurnar eru að fljúga í kringum okkur."

Móðir hennar: „Hafa þeir þá komið auga á þig?"

Julie: „Þeir eru að leita að fólki í vatninu, það er ekki búið að ná í okkur ennþá!"

Julie: „Hvað segja fréttirnar?"

Móðir hennar: „Lögreglan er líka farin á bát til Úteyjar, annars ekkert nýtt. Það er ekki

komið í ljós með manninn sem skaut, svo haltu þér í ró. Bíddu eftir að einhver sækji þig."

Móðir hennar: „Nú hafa þeir tekið hann!"



Hægt er að nálgast frekari umfjöllun og lesa skeytasendingarnar á norsku á vef Verdens Gang.