Strauss-Kahn slakar á undir dönskum fiðluleik

Fiðlutónleikar með danska fiðluleikaranum Nikolaj Znaider gáfu Dominque Strauss-Kahn fyrrum forstjóra Alþjóðagjaldeyrissjóðsins tækifæri til að slaka aðeins á í annars alvarlegri stöðu sinni.

Þetta kemur fram í The New York Times og börsen vitnar til á vefsíðu sinni. Tónleikarnir fóru fram í Lennox í Massachusetts s.l. fimmtudag en þar sat Strauss-Kahn ásamt eiginkonu sinni í dýrustu sætunum og hlýddu á danska fiðlusnillinginn.

Það fylgir sögunni að Strauss-Kahn hafi ekki viljað ræða við blaðamenn eftir tónleikana.

Saksóknari í málinu gegn Strauss-Kahn hefur ákveðið að halda ákærunni til streitu þrátt fyrir að vitnisburður fórnarlambs Strauss-Kahn þyki mjög ótrúverðugur. Réttarhöldunum hefur samt verið frestað og eiga þau nú að hefjast þann 1. ágúst n.k.