Mótshaldarar í Barein hafa hætt við að halda Formúlu 1 mót, en FIA tilkynnti í síðustu viku á mót yrði í Barein 30. október. En í frétt á autosport.com í dag segir að mótið muni ekki fara fram samkvæmt tilkynningu frá skipuleggjendum mótins. Upphaflega átti mótið að fara fram 13. mars, en var frestað vegna pólitísks ástands í landinu.
Barein mótið var síðan í síðustu viku sett á dagskrá á ný af FIA á dagsetningu sem mót í Indlandi hafði áður verið sett á og átti að færa mótið í Indlandi til 11. desember. Forsvarsmenn keppnisliða kvörtuðu formlega yfir breytingunni, bæði vegna skipulagsmála varðandi ferðir og kostnað og einnig voru menn ósáttir að keppa 11.desember.
Zayed R. Alzayani, einn af yfirmönnum á Barein brautinni sagði að í ljósi þess að keppnisliðin væru óánægð með breytingar á mótaskránni þá væri lítils að halda mót sem skapaði vandmál fyrir keppendur.
„Barein hefur engan áhuga á að skipuleggja mót sem lengir keppnistímabilið og skemmir fyrir því að ökumenn, lið eða stuðningsmenn njóti Formúlu 1. Við viljum að hlutverk okkar í Formúlu 1 sé byggt á jákvæðni og sé uppbyggilegt sem fyrr. Þess vegna teljum við að það sé íþróttinni fyrir bestu að fylgja því ekki eftir að mótið verði á dagskrá á þessu ári", sagði Alzayani m.a. í fréttatilkynningu.
Hann sagðist hlakka til að bjóða mönnum til keppni í Barein á næsta ári og þakkaði þeim sem hafa komið að málinu fyrir stuðning og skilning.
Hætt við mótshald í Barein
