Button: Lærðum að vinna sem lið í síðustu keppni

Jenson Button telur að McLaren hafi lært sína lexíu varðandi gerð keppnisáætlanna í síðasta móti, en aðferðafræðin hefur breyst nokkuð útaf nýjum dekkjum sem notuð eru á þessu keppnistímabili. McLaren keppir á Spáni um næstu helgi.

Pirelli sér liðum fyrir dekkjum og það hefur reynt á þolrif ökumanna og starfsmanna keppnisliða varðandi skipulag í mótum vegna þess. Helgina eftir mótið á Spáni er keppt í Mónakó og því mikilvægur tími framundan hjá Formúlu 1 liðum.

„Við mætum jákvæðari til Spánar og Mónakó með endurbætta bíla. Það sýndi sig í Tyrklandi að við erum enn að læra inn á dekkin og það var hart að tapa sæti á keppnisáætlun sem virkaði ekki sem skyldi. Við lærðum okkar lexíu um samstarfið innan liðsins og hvernig á að haga keppnisáætluninni miðað við dekkin", sagði Button um næsta mót.

„Mótið í Katalóníu verður áhugavert og það verður skrítið að fara á braut sem við vorum í vandræðum með bílinn á í vetur. Vonandi getum við þó keppt á toppnum. Brautin í Katalóníu fyrirgefur ekki og laðar það besta fram í bílunum. Það er mikilvægt að ná góðum árangri, ekki síst vegna þess að við vorum svo beint til Mónakó. Það er mikilvægt að halda slagkraftinum", sagði Button.

Hamilton vonast eftir framförum McLaren um helgina.

„Mótið í Katalóníu hefur venjulega verið fyrsta mótið í Evrópu og við erum bjartsýnir á að við berjumst um stóru stigin á ný um helgina. Við náðum ekki að sýna okkar rétta andlit í Tyrklandi", sagði Hamilton.

„Það verður áhugavert að sjá hvort stillanlegi afturvængurinn breytir gangi mála á brautinni. Það hefur verið erfitt að fara framúr á brautinni gegnum tíðaina, en fyrsta beygjan gefur besta færið á framúrakstri, en það er vandasamt verk", sagði Hamilton og vildi meina að það yrði ekki auðvelt að beita afturvængnum á Katalóníu brautinni á sama hátt og í síðustu tveimur mótum. Í síðustu keppni voru um 80 framúrakstrar.