Skortur á íslenskum fiski á Grimsby markaðinum

Fiskkaupendur í Bretlandi hafa nú vaxandi áhyggjur af skorti á íslenskum fiski á fiskmarkaðinum í Grimsby. Um er að ræða stærsta fiskmarkað Bretlandseyja en um 75% af fiskinum þar hefur komið frá Íslandi.

Í frétt um málið á BBC segir að verulega hafi dregið úr framboðinu á ferskum fiski frá Íslandi sökum efnahagsástandsins hér og stefnu stjórnvalda um að verka aflann heima. Norðmenn hugsa sér gott til glóðarinnar en von er á norskri sendinefnd til Grimsby á næstunni til að ræða aukinn útflutning frá Noregi á þennan markað. Það yrði ekki í fyrsta sinn sem Norðmenn reyna að ræna mörkuðum frá Íslendingum.

BBC ræðir við fisksalann Andy Fyche um málið. Hann segir að vegna þess hve dregið hefur úr framboði á íslenskum fiski geti hann ekki treyst markaðinum lengur. „Nú verðum við að sækja fiskinn beint til Færeyja,“ segir Fyche.

Fram kemur að fisksalar séu óhressir með að þurfa að kaupa fisk beint frá Færeyjum og Noregi því þá séu þeir í miklum mæli að kaupa fiskinn óséðan. Á markaðinum í Grimsby hinsvegar sjá þeir hvað þeir eru að kaupa. Simon Goodwin fiskkaupandi í Grimsby segir að þannig vilji hann kaupa sinn fisk.