Heimsendir 21. maí 2011?

"Það verður heimsendir þann 21. maí árið 2011, klukkan sex að morgni að staðartíma í Kalíforníu," segir útvarpspredikarinn Harlold Camping, sem hefur spáð í tölur í um 70 ár en hann er verkfræðingur að mennt.

Harold er þekktur víðsvegar um heiminn og rekur hann fjöldan allan af útvarpsstöðvum í Bandaríkjunum og um allan heim. Tugir þúsunda manna um allan heima líta á hann sem spámann en hann rekur trúarsöfnuð sem er metinn á 120 milljónir bandaríkjadollara.

Það var fyrir nokkrum árum sem Harold var að brjóta heilann og leika sér að tölum þegar hann komst að því að heimurinn muni farast í maí næstkomandi. „Vegna menntunar minnar var ég mjög áhugasamur um tölur. Ég hugsaði: "Afhverju ætli Guð hafi búið til þessa tölu, eða þessa tölu?" Þetta var ekki spurning um trúleysi, heldur að það hlyti að vera ástæða fyrir þessu."

Og ástæðan fyrir því, að hann komst að því að 21. maí næstkomandi er dagurinn sem heimurinn mun farast, er fólgin í margföldunartöflunni.

Hann margfaldaði tvívegis þrjár helgar tölur, 5, 10 og 17 og fékk töluna 722.500. Og þann 21. maí árið 2011 eru akkúrat liðnir 722.500 dagar frá krossfestingu Krists, en hann var krossfestur 1. apríl árið 33. Það þýði að heimsendir verði þennan dag, segir Harold.

Harold hefur áður spáð fyrir heimsendi, það var þann 6. september árið 1994. Þá komu meðlimir í söfnuði hans saman, klæddu börn sín í fínustu fötin sín og héldu Biblíunni opinni í átt að himni. En það kom enginn heimsendir þennan dag.

Harold sagði daginn eftir að hann hefði eitthvað misreiknað sig þegar hann margfaldaði tölurnar. Hann eyddi því næstu 17 árum í að reikna upp á nýtt og hefur komist að niðurstöðu. Heimsendir verður 21. maí á þessu árið. Hvort honum hafi tekist að reikna rétt í þetta skiptið, verður að koma í ljós í maí. Og þá er tekið með í reikninginn að hann sé spámaður!