Klámfengin forn vasaúr undir hamarinn

Maður nokkur í Sviss hefur sett lífsverk sitt á uppboð en hans helsta ástríða var að safna klámfengnum vasaúrum frá 17. og 18. öld. Úrasafn þetta verður boðið upp á vegum Antiquorum í Genf sem sérhæfir sig í sölu á fágætum og verðmætum úrum.

Í frétt um málið á business.dk segir að eitt af úrunum sé þess eðlis að það hafi tvöfalt gangverk. Á framhlið þess er virðingarvert munstur af tónlistarmönnum og dúfum. En opni maður framhliðina kemur önnur slík upp þar sem sjá má par í sérdeilis áköfum ástarleik. Þetta úr er metið á allt að 90.000 dollara eða um 10 milljónir kr.

Úrin sem Antiquorum mun setja á uppboð eru hluti af 700 úra safni í eigu Svisslendingsins en þeim hefur hann safnað saman á síðustu 25 árum. Framleiðsla á „klámfengnum" vasaúrum hófst á 16. öld en þau voru einkum ætluð til sölu í Kína þar sem mikil eftirspurn var eftir þeim á þessum tíma.