Pískuð fyrir óléttu eftir nauðgun

Sextán ára gömul stúlka í Bangladesh hefur verið pískuð eitthundrað og eitt högg fyrir að verða ófrísk þegar henni var nauðgað.

Jafnframt var faðir hennar dæmdur til þess að greiða sekt og sagt að fjölskyldan yrði gerð útlæg úr þorpinu ef hann borgaði ekki.

Það var tvítugur maður sem nauðgaði stúlkunni í apríl á síðasta ári. Dagblaðið Daily Star segir að hún hafi skammast sín svo mikið eftir árásina að hún hafi ekki kært hana.

Stúlkan var gift öðrum manni í snatri eftir árásina en eiginmaðurinn skildi við hana eftir nokkrar vikur þegar í ljós kom að hún var ófrísk.

Öldungaráð múslima lét setja stúlkuna í einangrun þartil fjölskylda hennar féllst á að henni yrði líkamlega refsað. Það hefur nú verið gert.

Öldungaráðið sýknaði hinsvegar nauðgarann af öllum ákærum.