Barcelona hélt enn eina skrautsýninguna gegn Sociedad

Börsungar halda áfram að raða inn mörkum í spænska boltanum. Þeir unnu í kvöld stórsigur 5-0 gegn Real Sociedad.

Lionel Messi skoraði tvö af mörkunum og voru þau bæði augnakonfekt. Í myndskeiðinu sem fylgir fréttinni má sjá fyrra mark þessa snillings en þá splundrar hann vörn Sociedad ásamt Daniel Alves.

David Villa og Andrés Iniesta höfðu skorað fyrir Barcelona áður en mörkin tvö frá Messi komu. Í lokin skoraði svo Bojan Krkic fimmta og síðasta markið.

Messi er kominn með 17 mörk og 8 stoðsendingar en Barcelona trónir á toppi deildarinnar með tveggja stiga forystu á Real Madrid.