Sara Björk: Þurfum að nýta hvert einasta færi gegn Frakklandi

Sara Björk Gunnarsdóttir var ánægð með 3-0 sigurinn gegn Króatíu þó mörg færi Íslands hafi farið í súginn. „Við hefðum átt að nýta færin okkar betur, bæði í þessum leik og leiknum um helgina," sagði Sara Björk.

„Króatíska liðið var fast fyrir og spilaði ekki fallegan fótbolta og við þurftum að vera virkilega þolinmóðar. Ég er samt sátt við þrjú stig og næst er það bara úrslitaleikur hér heima við Frakkana."

„Það verður ekki auðvelt verkefni en við munum allar gefa okkur 100% í þann leik og bíðum allar spenntar eftir honum. Við trúum því algjörlega að við getum unnið þann leik," sagði Sara Björk en leikurinn gegn Frakklandi verður á menningarnótt eins og frægt er.

„Við þurfum að nýta hvert einasta færi gegn Frakklandi. Við þurfum að fara vel yfir það því það er mikilvægt að vinna þann leik."