Atli: Við ætlum að vinna þessa seríu

Atli Hilmarsson, þjálfari Stjörnunnar, var ekki af baki dottinn þrátt fyrir tap sinna stúlkna í fyrsta leiknum gegn Fram í kvöld.

„Við eigum í fullu tré við þetta lið og við ætlum að vinna þessa seríu. Gerðum of mikið af tæknifeilum í þessum leik og missum hausinn á stórum kafla. Við komum þó til baka og það segir mér að við eigum kraft og trú," sagði Atli við Sporttv eftir leikinn.

„Það voru margir búnir að afskrifa okkur fyrir leikinn en ég vona að við séum enn í umræðunni. Ég hef í það minnsta fulla trú á mínu liði. Ég var líka ánægður með eldri stelpurnar sem komu inn í liðið í kvöld og hjálpuðu því mikið. Mér fannst liðið sýna mikinn karakter í kvöld og við ætlum að nýta okkur það í næsta leik."

Liðin mætast í Mýrinni á sunnudag.