Reynir Þór: Við eigum mikið inni

Reynir Þór Reynisson, þjálfari Fram, var að vonum mjög ánægður með leik sinna manna í kvöld en Framarar unnu frábæran sigur á FH-ingum 33-38 í fimmtu umferð N1-deild karla.

„Ég er virkilega ánægður með strákana en það koma ekki öll lið hingað í Krikann og sigra FH. Við vorum að spila alveg hreint frábæran sóknarleik allan leikinn  og markaskorið dreifðist á allt liðið sem sýnir hversu mikla breidd við erum með ,“ sagði Reynir.

Framarar léku fínan varnarleik í kvöld og náðu að stoppa Ólaf Guðmundsson, leikmann FH-inga.  

„Varnarleikurinn hjá okkur gekk mjög vel og við náðum að stoppa vinstri vænginn hjá þeim sem var markmiðið. Við gáfum aðeins eftir í restina og hleyptum þeim allt of mikið inn í leikinn. Það var ánægjulegt að ná samt sem áður að halda haus og klára leikinn,“ sagði Reynir.

„Ég er mjög ánægður með þann stíganda sem er í liðinu. Við höfum verið að bæta okkur jafnt og þétt allt mótið og það er á hreinu að liðið á mikið inni,“ sagði Reynir eftir leikinn í kvöld.