Benítez: Það er bara hálfleikur

„Við fengum á okkur furðulegt mark og skoruðum mark sem hefði átt að standa en var dæmt af. En það er í lagi, það er bara hálfleikur," sagði Rafa Benítez, stjóri Liverpool, eftir leikinn í Madríd í kvöld.

Atletico Madrid vann 1-0 sigur á Liverpool í fyrri undanúrslitaviðureign liðanna í Evrópudeildinni.

„Það er margt sem ég var ekki ánægður með í okkar leik í kvöld. Ég held að ástæðan sé þó ekki að við höfum verið eitthvað þreyttir," sagði Benítez en liðið þurfti að ferðast með lestum í leikinn vegna gossins í Eyjafjallajökli.

„Seinni leikurinn er eftir á Anfield. Þá verður völlurinn troðfullur af okkar frábæru stuðningsmönnum. Við erum ekki úr leik, klárlega ekki."