Dæmt í máli Ferrari á miðvikudag

Íþróttaráð FIA tekur fyrir mál Ferrari frá því í þýska kappakstrinum, en dómarar dæmdu liðið brotlegt fyrir að hagræða úrslitum með liðsskipun. Felipe Massa hleypti Fernando Alonso framúr sér, þegar hann var í fyrsta sæti í mótinu og liðið fékk 100.000 dala fjársekt fyrir að beita liðsskipunum. Alonso og Massa náðu fyrsta og öðru sæti í mótinu. Dómarar vísuðu svo málinu áfram til FIA til frekari umfjöllunar. Samkvæmt frétt á autosport.com verður Stefano Domenicali eini fulltrúi Ferrari hjá íþróttaráði FIA á miðvikudag í París. Hvorki Felipe Massa né Fernando Alonso verða til staðar, en verða í kallafæri við síma eða myndatökubúnað ef þörf krefur. Þeir keppa í ítalska kappakstrinum um helgina á Monza brautinni. Í frétt autosport.com eru ýmsar vangaveltur um hvaða niðurstaða geti orðið hjá FIA á morgun. Rætt er að Ferrari gæti sloppið alveg við frekari refsingu, fengið tímabundið bann, meiri fjársekt, tapað öllum stigum fyrir þýska kappaksturinn eða verði bannað frá Formúlu 1. Mál Ferrari verður tekið fyrir klukkan 3 að staðartíma í París og niðurstaðan væntanlega birt síðdegis.