Keppendur tímamældir til að flýta leik á Íslandsmótinu í golfi í dag

Margir kvörtuðu yfir hægum leik á fyrsta hring á Íslandsmótinu í golfi á Kiðjabergi í gær, enda voru sumir um fimm klukkustundir að leika 18 holur. Mótstjórn tók þá ákvörðun í morgun að tímamæla keppendur með fimm ráshópa millibili og munu tímaverðir ganga með hollunum þrjár brautir í dag. Í morgun þurfti að áminna tvö holl fyrir hægan leik. Þetta kom fram á heimasíðu GKB.

Þá hefur framvörðum (For-Caddyum) verið fjölgað upp í sex á fyrstu brautinni og þar hafa einnig verið settir upp fleiri stefnuhælar. Þetta ætti að auvelda leikhraða, en í gær var mest um tafir á fyrstu brautinni.

Þeir sem voru í fyrsta ráshópi í morgun eru komnir í hús og má geta þess að það tók það rétt innan við fjórar klukkustundir að klára leik. Einn þeirra, Rúnar Óli Einarsson, lék hringinn á 73 höggum. Áætlaður leiktími hjá hverju holli er 4:30 klst. og verður reynt að sjá til þess að þau tímamörk verði virt.