Fernando Alonso vann ítalska kappaksturinn

Ferrari-menn fögnuðu góðum árangri í ítalska kappakstrinum í formúlu eitt á Monza-brautinn á Ítalíu í dag. Fernando Alonso vann fyrsta sigur Ferrari á brautinni í fjögur ár og Felipe Massa náði þriðja sætinu á eftir Jenson Button hjá McLaren.

Þetta var 18. sigur Ferrrari í ítalska kappakstrinum og þriðji sigur liðsins á þessu tímabili. Michael Schumacher hafði verið síðasti Ferrari-maðurinn til þess að vinna á Monza þegar hann vann sinn fimmta titil á brautinni árið 2006.

Mark Webber hjá Red Bull náði aðeins sjötta sætinu í kappakstrinum en það nægði honum þó til þess að koma honum aftur í efsta sætið í keppni ökumanna.

Lewis Hamilton á McLaren féll nefnilega strax út í fyrsta hring þegar hann keyrði utan í Massa og eyðilagði hægra hjólið að framan. Hamilton er í öðru sætinu í stigakeppninni fimm stigum á eftir Webber.

Þriðji sigur ársins hjá Fernando Alonso þýðir að hann er 21 stigi á eftir Webber þegar fimm mót eru eftir. Hann er nú búinn að vinna 24 mót á ferli sínum í formúlu eitt.



Lokastaðan í Monza-kappakstrinum:

1. Alonso, Ferrari

2. Button, McLaren

3. Massa, Ferrari

4. Vettel, Red Bull

5. Rosberg, Mercedes

6. Webber, Red Bull

7. Hulkenberg, Williams

8. Kubica, Renault

9. Schumacher, Mercedes

10. Barrichello Williams

Staðan í keppni ökumanna:

1. Webber, Red Bull 187

2. Hamilton, McLaren 182

3. Alonso, Ferrari 166

4. Button, McLaren 165

5. Vettel, Red Bull 163

6. Massa, Ferrari 124

7. Rosberg, Mercedes 112

8. Kubica, Renault 108