Enn finnst fólk í hrakningum á Fimmvörðuhálsi

Björgunarsveitarmenn á Fimmvörðuhálsi fundu enn kalda og hrakta göngumenn á slóðum eldgossins seint í gærkvöldi eftir að myrkur var skollið á. Þeir leituðu af sér allan grun um fleiri, sem þannig væri ástatt um, áður en haldið var til byggða, þangað sem þeir komu um klukkan tvö í nótt. Annars var engin umferð við gosstöðvarnar Landeyja megin í nótt.

Heldur hefur dregið úr vindi á svæðinu, en spáð er norðan átta til þrettán metrum á sekúndu og að vindkæling samsvari 18 til 24 stiga frosti. Fáir skjálftar voru á svæðinu í nótt, en gosið heldur áfram.-