Hátíðarhöld vegna sjötugsafmælis Margrétar Þórhildar Danadrottningar hafa gengið eins og í sögu í dag. Danskir fjölmiðlar voru farnir að gæla við það að öskuskýin myndu rigna á drottninguna en þau létu hvergi á sér kræla.
Drottningin ók í hestvagni um götur Kaupmannahafnar og veifaði til þegna sinna, sem flykktust út á götu með danska fánann í hönd.
Haldin var athöfn í ráðhúsi Kaupmannahafnar og mættu drottningin og maður hennar, Henrik prins á svalirnar þar til að veifa fólkinu. Öll konungsfjölskyldan kom síðan seinna út á svalir á Amalienborg-höll í miklu stuði og hrópaði nífalt húrra.
