Real Madrid vann 5-1 sigur á Athletic Bilbao í spænsku úrvalsdeildinni í kvöld og tók því toppsætið af Barcelona. Börsungar sátu á toppnum í tvo tíma eftir 8-0 sigur á Almería fyrr í kvöld.
Cristiano Ronaldo skoraði þrennu fyrir Real Madrid í leiknum og er þessi portúgalski snillingur því kominn með fimmtán mörk í fyrstu tólf umferðunum í spænsku deildinni.
Gonzalo Higuaín kom Real Madrid í 1-0 á 19. mínútu eftir sendingu frá Ángel Di María og Cristiano Ronaldo skoraði síðan á 30. mínútu eftir snilldarsókn og stoðsendingu frá Mesut Özil.
Fernando Llorente minnkaði muninn fyrir Bilbao fjórum mínútum fyrir hálfleik en Real gerði endanlega út um leikinn með tveimur mörkum á fyrstu 17 mínútunum í seinni hálfleik.
Sergio Ramos skoraði fyrst úr vítaspyrnu á 57. mínútu sem Ángel Di María fékk og Ronaldo skoraði síðan beint úr aukaspyrnu á 62. mínútu.
Cristiano Ronaldo innsiglaði síðan þrennuna sína í uppbótartíma þegar hann skoraði úr víti sem hann þurfti reyndar að taka tvisar sinum.
Real Madrid hefur eins stigs forskot á Barcelona en liðin mætast síðan í El Clasico á mánudaginn eftir rúma viku.
Real Madrid tók toppsætið aftur af Barcelona - þrenna hjá Ronaldo
