„Þetta er bara helvíti gaman," sagði Gabríel Björnsson, fjórtán ára, sem þurfti að verja aðfaranótt sunnudags í fjöldahjálparmiðstöðinni í grunnskólanum á Hvolsvelli. Hann var vakinn með þeim fregnum að gos væri hafið og þurfti undir eins að yfirgefa bæinn Lindartún í Vestur-Landeyjum ásamt fjölskyldu sinni.
Gabríel lét vel af vistinni í skólanum, þar sem hann gat komist í ballskák með krökkum á svipuðu reki.
Gosið kom honum ekki í opna skjöldu, enda hefur hann fylgst vel með skjálftavirkninni á svæðinu að undanförnu. „Ég átti von á því að þetta færi að gerast," sagði Gabríel, og skaut síðustu kúlunni á borðinu þéttingsfast í hornvasann fjær. - sh
