Fjögur sambönd fengu milljón í styrk frá Afrekskvennasjóðnum

Afrekskvennasjóður Íslandsbanka og ÍSÍ var stofnaður til þess að styðja við bakið á afrekskonum í íþróttum og gera þeim betur kleift að stunda sína íþrótt og ná árangri. Það var úthlutað úr sjóðnum í sjötta sinn í dag.

Stjórn sjóðsins skipa þær Svafa Grönfeldt, Vanda Sigurgeirsdóttir og Þórdís Gísladóttir. Umsóknir um styrk voru 63 talsins en stjórn sjóðsins valdi að þessu sinni að styrkja eftirtalda landsliðshópa um eina milljón hvern.

Skíðasamband Íslands vegna landsliðs kvenna á skíðum og þátttöku þeirra á Heimsmeistaramótinu sem fram fer í Garmisch í Þýskalandi í febrúar n.k.

Einhverjar úr hópnum eiga þess jafnframt kost að tryggja sér þátttökurétt á Heimsmeistaramóti unglinga sem fram fer í Sviss í febrúar. Auk Heimsmeistaramótanna eru fjölmörg alþjóðleg mót á dagskránni í vetur.

Mikill metnaður er í hópnum sem æfir stíft og er þegar farinn að horfa til Ólympíuleikanna í Sochi 2014.

Frjálsíþróttasamband Íslands fær styrk vegna landsliðsverkefna kvenna á komandi ári. Íslenskar frjálsíþróttakonur hafa náð mjög frambærilegum árangri á undanförnum árum.

Skemmst er að minnast HM19 ára og yngri sem fram fór í síðast liðið sumar. Á mótið náðu þrír einstaklingar lágmörkum, allt konur. Komust þær allar í úrslit í sinni grein.

Á næsta ári eru fjölmörg alþjóðleg verkefni sem afrekskonurnar keppast við að tryggja sér þátttöku á. Má þar nefna Evrópumeistaramót innnanhúss í París, Evrópubikarkeppni í fjölþrautum og HM í Kóreu auk Evrópu- heims- og Norðurlandamóta 17, 19 og 22 ára.

Fimleikasamband Ísland fær styrk vegna þátttöku kvenna og stúlkna á Evrópumótinu í hópfimleikum sem fram fór í Malmö 19. - 24. október s.l. Mótið var merkilegt fyrir margra hluta sakir.

Í fyrsta skipti var keppt í tveimur aldurshópum og í fyrsta skipti var um keppni landsliða að ræða. Ísland sendi unglingalandslið sitt til keppni í ungmenna flokki.

Í fullorðinsflokki voru tvö lið sem kepptu fyrir Íslands hönd. Skemmst er frá því að segja að liðin stóðu sig frábærlega. Ungmennaliðið náði þriðja sæti og fullorðinsliðin urðu í fyrsta og áttunda sæti.

Mikill metnaður var lagður í þessa fyrstu landsliðsferð í hópfimleikum, greinin hefur verið í mikilli sókn hér á landi. Þessi glæsilegi árangur mun vonandi enn frekar ýta undir framgang greinarinnar.

Handknattleikssamband Íslands fær styrk vegna þátttöku kvennalandsliðsins í úrslitakeppni Evrópumóts kvenna sem fram fer í Noregi og Danmörku nú í desember.

Liðinu tókst að tryggja sér þátttöku á mótinu með því að hafa betur gegn Austurríki í riðlakeppnini sem fram fór sl. vetur/vor. Í riðlinum voru einnig Frakkland og Bretland. Liðið vann leikina við Bretland en tapaði fyrir Frakklandi.

Er þetta í fyrsta sinn sem handknattleikslandsliði kvenna tekst að tryggja sér keppnisrétt í úrslitum stórmóts. Í lokakeppninni leika 16 lið og er Ísland í riðli með Rússlandi, Króatíu og Svartfjallalandi.

Nú er lokaundirbúningur liðsins framundan sem meðal annars felur í sér æfingaferð til Noregs nú í lok nóvember þar sem liðið leikur við lið Danmerkur, Noregs og Serbíu. Síðan verður farið til Danmerkur og leikinn einn æfingaleikur við Spán áður en mótið hefst svo 7. desember.