Rolex úr seljast eins og heitar lummur í Noregi

Rolex úr seljast eins og heitar lummur í Noregi en sala þeirra hefur aukist um 46% það sem af er árinu miðað við sama tímabil í fyrra.

Það er úrsmiðurinn Halvor Bjerke sem er með umboðið fyrir Rolex í Noregi og segir hann í samtali við vefsíðuna e24.no að hann reikni með að selja yfir 500 Rolex úr í Noregi í ár en það er mest fjöldi slíkra úra sem seldur hefur verið í landinu frá því að Bjerke fékk umboðið árið 1976.

Rolex úrin kosta á milli 100.000 og 400.000 norskra kr. hjá Bjerke eða allt að 8 milljónum kr. stykkið. Bjerke segir að hin mikla sala á Rolex úrunum þýði að þau standa nú fyrir um þriðjungi af veltu úrsmiðsins. Hann gerir ráð fyrir að veltan í ár nái um 58 milljónum norskra kr. eða vel yfir milljarði kr.

Bjerke segir að kaup á Rolex úri sé góð fjárfesting. Hann nefnir sem dæmi viðskiptavin sem nýlega kom að máli við sig. Sá hafði keypt Rolex úr af Bjerke árið 1979 og greiddi 2.500 norskar kr. fyrir. Hann seldi þetta úr nýlega á 20.000 dollara.