Tiger Woods kláraði ekki lokahringinn á Players-meistaramótinu í golfi í nótt þar sem hann varð að hætta vegna hálsmeiðsla þegar hann var búinn með 7 af 18 holum á lokahringnum.
Þetta var aðeins þriðja mótið hjá Tiger eftir að hann snéri aftur út á golfvöllinn eftir kynlífshneykslið sitt. Hann var tveimur yfir pari á lokadeginum en tveimur undir pari í öllu mótinu þegar hann varð að hætta.
„Ég hef verið að spila í mánuð með verki í hálsinum. Ég hef verið að spila í gegnum sársaukan en ég gat það bara ekki lengur. Þetta er farið að leiða niður í fingurna," sagði Tiger Woods sem ætlar að fara í myndatöku í næstu viku en varð líklega fyrir þessum meiðslum á Masters-mótinu.
Tiger var í 45. sæti á mótinu þegar hann varð að hætta en hann hafði ekki hætt í miðju móti síðan árið 2006 þegar hann varð að hætta keppni vegna flensu.
Suður-Afríkumaðurinn Tim Clark vann Players-mótið en hann lék á einu höggi betur en Robert Allenby og Lee Westwood. Westwood var með forustuna fyrir lokadaginn.
