Get ekki ímyndað mér að Tiger sleppi Masters

Gamla brýnið Jack Nicklaus segist ekki trúa öðru en að Tiger Woods verði kominn aftur út á golfvöllinn áður en Masters-mótið fer fram.

„Það kæmi mér verulega á óvart ef hann tæki ekk þátt á Masters. Ég get bara ekki ímyndað mér að hann geti sleppt því að spila á Augusta," sagði hinn sjötugi Nicklaus.

„Ég hef ekkert verið að tjá mig um mál Tigers enda koma þau mér ekkert við. Sem golfari þá get ég samt ekki ímyndað mér annað en að hann spili."

Tiger hefur unnið Masters-mótið fjórum sinnum og hefur spilað þar á hverju ári síðan 1995. Hann vann mótið síðast árið 2005.

Woods hefur ekki keppt síðan 15. nóvember á síðasta ári.