Webber stefnir sigur í Brasilíu

Mark Webber hjá Red Bull vann mótið í fyrra á Interlagos brautinni í Brasilíu sem keppt er á um helgina og ef hann vinnur tvö síðustu mót ársins getur hann orðiði heimsmeistari ökumanna í fyrsta skipti á ferlinum. Webber var í 14 stiga forystu í stigamóti ökumanna fyrir síðustu keppni, en gerði afdrifarík mistök í akstri og féll úr leik með laskaðan bíl. Webber er núna 11 stigum á eftir Fernando Alonso í stigamóti ökumanna, en Alonso getur orðið meistari um helgina ef hann nær hagstæðum úrslitum og keppinautar hans skáka honum ekki stigalega séð. Ef Webber sigrar í Brasilíu á sunnudaginn og síðan í lokamótinu í Abu Dhabi um aðra helgi getur hann orðið meistari, sama hvaða árangri Alonso nær og aðrir kappar í titilslagnum eiga þá heldur ekki möguleika. Webber telur mótið í Brasilíu eitt það skemmtilegasta á ári hverju, þar sem góð stemmning er á mótssvæðinu meðal áhorfenda. Fjórir brasilískir Formúlu 1 ökumenn keppa um helgina á Interlagos brautinni. Þetta eru þeir Felipe Massa, Rubens Barrichello, Lucas di Grassi og Bruno Senna. "Brasílumenn eru áhugasamnir um akstursíþróttir og hafa átt marga meistara gegnum tíðina. Ég á auðvitað góðar minningar frá keppninni í fyrra. Það var skemmtilegt mót að vinna og ég mun augljóslega reyna að ná öðrum sigri í ár. Við verðum að ná sem bestum úrslitum á lokasprettinum", sagði Webber í tilkynningu frá Red Bull liðinu á f1.com.