Mourinho: Real eða Inter

Jose Mourinho segir að það eina sem komi til greina hjá honum í sumar er að halda áfram sem knattspyrnustjóri Inter á Ítalíu eða þá taka við Real Madrid á Spáni.

Þetta sagði hann í samtali við spænska dagblaðið Marca í dag. Inter mætir Bayern München í úrslitaleik Meistaradeildar Evrópu en leikurinn fer einmitt fram á heimavelli Real Madrid.

„Ekkert annað félag gæti fengið mig til að fara frá Inter nú. En ef ég færi frá Inter væri það með góðri samvisku," sagði Mourinho og sagði ekki hægt að hafna tækifæri að þjálfa lið eins og Real Madrid.

„Ef maður er þjálfari eða frábær leikmaður vill maður fá tækifæri hjá Real Madrid. Ég vil fá þetta tækifæri en get ekki sagt hvort það gerist á næsta tímabili eða síðar."