Atli Hilmarsson: Þær voru betri á öllum sviðum í kvöld

Atli Hilmarsson, þjálfari Stjörnunnar var að sjálfsögðu óánægður með leik sinna stelpna í kvöld en Stjarnan tapaði þá með fjögurra marka mun fyrir Fram á heimavelli.

„Þetta var mjög sanngjarn sigur hjá Fram í kvöld og hann var síst of stór. Þær voru betri á öllum sviðum. Það var lítið sem féll með okkur. Varnarleikurinn sem er okkar aðall var ekki að virka nógu vel og það er bara of mikið fyrir okkar lið að fá okkur 31 mark," sagði Atli eftir leikinn.

„Varnarleikurinn hefur verið plúsinn okkar og ég vil meina það að ef að við hefðum spilað betri vörn þá hefðum við getað unnið þetta," sagði Atli.

„Við byrjum leikinn á því að komast í 4-1 og við hefðum þurft að fylgja því betur eftir. Við hleyptum þeim alltof fljótt inn í leikinn og svo var byrjunin á seinni hálfleiknum alveg skelfileg," sagði Atli en Fram skoraði sjö af fyrstu níu mörkum seinni hálfleiks.

Framundan eru sex aðrir leikir hjá Stjörnuliðinu áður en janúar er allur og stelpurnar hans Atla fá ekki langan tíma til að sleikja sárin.

„Það er mjög slæmt að byrja svona stífa dagskrá á svona leik. Það er strax hörkuleikur á móti Fylki á laugardaginn. Við þurfum að safna kröftum og koma okkur af stað aftur í það. Það verður mjög erfitt og við erum að missa út leikmenn. Við þurfum að lenda í fjórum efstu sætunum og þetta var tap á móti einu liði sem klárlega lendir þar. Við þurfum að koma okkur í hóp fjögurra efstu og þangað stefnum við núna," sagði Atli að lokum.