Button: SIngapúr mótið eitt besta mótið

23. september 2010 15:39

Jenson Button var í mikilli keppni við Fernando Alonso um fyrsta sætið á Monza. Hann varð annar á eftir Alonso. Mynd: Getty Images

Heimsmeistarinn Jenson Button hjá McLaren er einn af fimm sem á möguleika á meistaratitlinum í ár og keppir í Singapúr um helgina.

"Mótið í Singapúr verður áhugavert, af því ég held að það muni skýra línurnar varðandi meistaratitilinn", sagði Button í frétt á f1.com.

Hann segir að McLaren bíllinn hafi ekki verið sérlega samkeppnisfær síðast þegar keppt var á lághraðabraut eins og í Singapúr. Brautirnir í Mónakó, Valencia og Búdapest þykja nokkuð líkar Singapúr að mati ýmissa ökumanna.

"Það hefur margt breyst síðan í Búdapest, ekki síst það að tekið var á reglum varðandi útbúnað bílanna. Þá hefur tæknilið McLaren unnið í að gera bíl okkar betri á hægari brautum."

"Þetta verður áhugavert fyrir alla, en við munum sjá getu Ferrrari og Red Bull og hvar við stöndum eftir mikla vinnu fyrir svona braut. Ég held að mótið Singapúr hafi sannað sig sem eitt af bestu mótum ársins og ég hlakka til að keppa", sagði Button, sem er fimmti í stigamótinu, en Mark Webber er fremstur.

Mótshelgin í Singapúr er sýnd á Stöð 2 Sport alla helgina, en tímatakan verður sýnd beint á Stöð 2 Sport 3, en síðan endurtekinn á Stöð 2 Sport síðdegis á laugardag.