Liverpool vann í Tyrklandi og er komið áfram

Liverpool komst í kvöld áfram í riðlakeppni Evrópudeildar UEFA eftir 3-1 samanlagðan sigur á Trabzonspor frá Tyrklandi.

Liverpool vann fyrri leikinn á heimavelli sínum, 1-0, en lentu undir strax á fjórðu mínútu í Tyrklandi í kvöld með marki Teofilo Gutierrez. Dirk Kuyt hafði misst boltann á miðjunni og Tyrkirnir brunuðu í skyndisókn og skoruðu.

Þannig var staðan allt þar til á 84. mínútu. Þá átti Glen Johnson fínan sprett inn á teig og gaf fyrir markið. Giray Kracar reyndi þá að bægja hættunni frá en varð fyrir því óláni að skora sjálfsmark.

Kuyt bætti svo fyrir mistökin er hann skoraði af stuttu færi undir lok leiksins er hann fylgdi eftir skoti varamannsins Daniel Pacheco sem var varið.

Dregið verður í riðlakeppni Evrópudeildarinnar á morgun.