Eiður tryggði Barcelona sigur á Atletico

Eiður Smári Guðjohnsen var í byrjunarliði Barcelona í kvöld þegar liðið lagði Atletico Madrid 2-1 á heimavelli sínum í síðari viðureign liðanna í 16-liða úrslitum spænska konungsbikarsins.

Það var fyrrum Liverpool-maðurinn Florent Sinama-Pongolle sem kom Atletico yfir í leiknum á 23. mínútu og gaf liði sínu veika von, en Barcelona vann fyrri leikinn í Madrid með þremur mörkum gegn einu.

Bojan Krkic var hinsvegar aðeins fimm mínútur að jafna leikinn og það var svo Eiður Smári sem rak endahnútinn á sanngjarnan sigur Barcelona í einvíginu með marki á 75. mínútu.

Barcelona er því komið í 8-liða úrslitin eftir 5-2 samanlagðan sigur.