Real Madrid að kaupa D'Agostino?

Samkvæmt Marca þá er Real Madrid nálægt því að ganga frá kaupum á miðjumanninum Gaetano D'Agostino frá ítalska félaginu Udinese.

Forsetinn Florentino Perez hjá Real Madrid er sagður hafa gefist upp á að fá miðjumennina Xabi Alonso frá Liverpool og Daniele De Rossi frá Roma og því væri D'Agostino raunhæfari og ódýrari kostur.

Hinn 27 ára gamli D'Agostino kom til Udinese árið 2006 og hefur síðan þá fest sig í sessi hjá félaginu og leikið það vel að í júní á þessu ári var hann kallaður inn í landsliðshóp Ítalíu fyrir vináttulandsleik gegn Norður-Írlandi, þar sem hann lék svo sinn fyrsta a-landsleik.