Sigurður: Viljandi hjá Kára

Sigurður Eggertsson, leikmaður Vals, segir að Kári Kristján Kristjánsson Haukamaður hafi viljandi gefið sér olnbogaskot sem varð til þess að hann rifbeinsbrotnaði í leik liðanna í gær.

Sigurður fór meiddur af velli í síðari hálfleik og kom í ljós eftir leikinn að hann er með brotið rifbein. Hann getur því ekkert spilað meira með Val í úrslitakeppninni. Haukar unnu leikinn í gær, 29-24, og hafa tekið forystu í einvígi liðanna um Íslandsmeistaratitilinn.

„Þetta var fullmikið viljandi hjá honum," sagði Sigurður aðspurður um atvikið. „Ég sannfærðist enn meira um það eftir að hafa séð þetta í sjónvarpi."

Kári Kristján hringdi í Sigurð eftir leikinn til að biðjast afsökunar og efast Sigurður um að hann hafi ætlað að meiða sig.

„Engu að síður er þetta frekar skítt. Ég hef áður fengið olnbogaskot en ekki brotið rifbein. Það er auðvitað fáránlega svekkjandi að geta ekki spilað meira með liðinu - sérstaklega þar sem ég hef aldrei verið svona góður í sókn áður. Mér finnst ég hafa verið voða fínn upp á síðkastið í sóknarleiknum."

Valur hefur misst marga leikmenn í meiðsli á leiktíðinni en auk Sigurðar eru þeir Ernir Hrafn Arnarson, Baldvin Þorsteinsson, Fannar Friðgeirsson frá vegna meiðsla og nafnarnir Sigfús Páll Sigfússon og Sigfús Sigurðsson tæpir vegna sinna meiðsla.

„Þetta er slatti af leikmönnum sem við höfum misst. En það er þó möguleiki að fá þá Dag Sigurðsson og Markús Mána Michaelsson aftur í liðið og eru það leikmenn sem kunna þetta. Þeir eru kannski svolítið ryðgaðir en verða vonandi þá þeim mun grófari. Það þarf jú að hefna," sagði Sigurður og hló.

Hann segist þrátt fyrir allt vera bjartsýnn fyrir framhaldið. „Ég er kannski það vitlaus en ég er alltaf bjartsýnn."