Eiður: Þurfum að halda einbeitingunni

Eiður Smári Guðjohnsen segir það mikilvægt að leikmenn Barcelona haldi einbeitingunni en liðið vann nauman 3-2 sigur á Espanyol í spænsku bikarkeppninni í gær.

Barcelona komst í 3-0 forystu í leiknum og var Eiður ánægður með frammistöðu sinna manna. Hins vegar fannst hann sínir menn gefa fullmikið eftir á síðasta hálftímanum enda skoruðu Espanyol tvö mörk á þeim tíma.

„Við erum komnir áfram í undanúrslitin og er það mikilvægt því það þýðir að við unnum einn leikinn til viðbótar," sagði Eiður í samtali við spænska fjölmiðla.

„En þrátt fyrir það fannst mér það sýna sig undir lok leiksins að við getum ekki leyft okkur að slaka á. Það getur valdið vandræðum."

„Við höfum hins vegar sýnt á tímabilinu að við getum unnið leiki þó svo að við lendum undir. Það er einn af styrkleikum liðsins."

„Við höfum notað mikið af orku og þurfum að vera einbeittir í hverjum einasta leik. En ég veit að við erum með stóran og góðan leikmannahóp og þar sem að þjálfarinn skiptir leikmönnum mikið út standa honum alltaf ferskir leikmenn til boða í hverjum leik."

Barcelona mætir Racing Santander á útivelli í spænsku úrvalsdeildinni á sunnudaginn og vill Eiður að liðið taki enn eitt skrefið í átt að spænska meistaratitlinum.

„Svona leikir eru alltaf erfiðir. En við höfum þegar náð góðum rispum í deildinni og getum það enn. Við þurfum að fara í hvern einasta leik eins og um úrslitaleik væri að ræða. Við megum ekki leyfa okkur að slaka á."

„Ég hef þegar séð á síðustu tveimur árum að ef við erum ekki upp á okkar besta þá gætum við þess klárað tímabilið án þess að vinna neitt."

Barcelona er með 53 stig í efsta sæti deildarinnar eftir 20 leiki og með tólf stiga forystu á Real Madrid sem er í öðru sæti.