Patrekur: Haukarnir fengu meistarabónus frá dómurunum

„Varnarleikurinn var fínn og markvarslan í fínu lagi. Haukarnir refsuðu okkur oft grimmilega en mér fannst sóknarleikurinn ágætur. Við vorum að koma skotum á markið en Birkir varði allt," sagði Patrekur Jóhannesson, þjálfari Stjörnunnar, eftir eins marks tap gegn Haukum, 16-17.

„Stundum þróast leikir þannig að það eru bara varnir og markvarsla. Auðvitað var sóknarleikurinn kannski ekkert rosalega góður hjá okkur en við komum okkur í færi og ég hefði viljað sjá meiri gæði í skotum."

Patrekur ákvað að taka það jákvæða úr leiknum þó svo hans menn hefðu verið grátlega nálægt því að næla í stig.

„Stór hluti af okkar hóp eru strákar sem eru að koma upp úr 2. flokki. Við lentum í áttunda sæti í fyrra og það er svo stórt stökk að mæta Íslandsmeisturum í fyrsta leik núna. Þetta fer í reynslubankann hjá þeim og ég mun byggja á þessu. Þetta var besti blái leikurinn sem ég hef séð hjá Stjörnunni síðan ég kom heim," sagði Patrekur en hvað fannst honum um dómarana?

„Dómararnir áttu kannski ekki von á því að við gætum þetta og mér fannst þeir pínu hliðhollir Haukum. Það er samt kannski eðlilegt að þeir fá smá meistarabónus en þeir hafa unnið fyrir honum. Samt í heildina fín lína hjá þeim enda góðir dómarar," sagði Patrekur um þá Jónas og Ingvar sem dæmdu leikinn.

Kunnuglegt andlit var á bekknum með Patreki í gær. Þar var mættur Sigurður Bjarnason, fyrrum þjálfari liðsins.

„Það hafa margir eflaust orðið hissa þegar þeir sáu Sigga með mér. Ég er sannfærður um að við eigum eftir að vinna vel saman með þetta lið og það er góð verkaskipting hjá okkur," sagði Patrekur en þjálfarnir eru báðir þekktir skaphundar.

„Við Siggi erum mjög líkir. Báðir skotfastir og skapmiklir," sagði Patrekur og glotti.