Aron: Þetta eru gífurlega góð úrslit fyrir okkur

„Þetta var bara virkilega flottur leikur hjá okkur gegn gríðarlega sterku pólsku liði á erfiðum útivelli. Þetta voru gífurlega góð úrslit fyrir okkur byggir upp hörkuleik á Ásvöllum um næstu helgi," sagði Aron Kristjánsson, þjálfari Hauka, eftir 30-28 tap gegn Wisla Plock í fyrri leik liðanna í 2. umferð EHF-keppninnar í handbolta.

Staðan var 15-12 Wisla Plock í vil í hálfleik en Haukar náðu svo forystu í leiknum í síðari hálfleik áður en heimamenn sigldu fram úr á nýjan leik.

„Þetta var mjög jafn leikur en við náðum yfirhöndinni í síðari hálfleik en lentum svo í því að missa leikmenn útaf og þá náðu Pólverjarnir að komast yfir aftur. Þeir voru mest með þriggja marka forskot þegar um fimm mínútur voru eftir og allt brjálað í húsinu en við náðum að halda haus og ég er gríðarlega ánægður með það.

Það hefði verið mjög auðvelt fyrir strákana að brotna við mótlætið en þeir gerðu það ekki og það er mjög gott. Þetta var flott frammistaða gegn mjög sterku liði. Pólverjarnir voru virkilega svekktir í leikslok því þeir áttu von á því að keyra yfir okkur með 6-10 mörkum en það gekk ekki eftir og það er smá högg fyrir þá. Þetta er hins vegar bara hálfleikur og það er mikilvægt fyrir okkur að ná að byggja upp góða stemningu fyrir seinni leikinn og fá Íslendinga til þess að fjölmenna og hjálpa okkur að slá út þetta sterka lið," segir Aron.

Sigurbergur Sveinsson fór á kostum í leiknum og skoraði tíu mörk fyrir Hauka en Björgvin Þór Hólmgeirsson, Elías Már Halldórsson og Pétur Pálsson skoruðu fjögur mörk hvor. Þá átti Birkir Ívar Guðmundsson góðan leik í markinu og varði 17 skot.

„Sigurbergur var frábær og skoraði tíu mörk þar af fimm úr vítum og var tekinn úr umferð á löngum stundum í leiknum og Björvin Þór stóð sig líka mjög vel og var að vaxa mjög í hlutverki sínu sem miðjumaður. Birkir Ívar var líka mjög öflugur í markinu en við vorum að spila 3-2-1 vörn nær allan leikinn og það gekk bara nokkuð vel og við vorum að valda þeim erfiðleikum," sagði Aron.

Mörk Hauka:

Sigurbergur Sveinsson 10 (5)

Björgvin Þór Hólmgeirsson 4

Elías Már Halldórsson 4

Pétur Pálsson 4

Einar Örn Jónsson 2

Freyr Brynjarsson 2

Guðmundur Árni Ólafsson 1

Heimir Óli Heimsson 1