Woods er spenntur fyrir endurkomunni

Stjörnukylfingurinn Tiger Woods segist spenntur fyrir því að snúa aftur til keppni á WGC-Accenture mótinu í Arizona í næstu viku.

Hinn 33 ára gamli Woods hefur ekki spilað síðan á Opna bandaríska eftir að hafa gengist undir uppskurð á hné og þá eignaðist hann sitt annað barn með konu sinni fyrir skömmu.

"Þetta er spurning um hversu ferskur maður verður. Það er eitt að spila góðan hring á æfingu eða gera það á PGA mótaröðinni á móti bestu kylfingum heims," sagði Woods.

"Ég hlakka mikið til að snúa aftur og fara að keppa. Það er auðvitað orðið langt síðan ég spilaði síðast og því er alveg kominn tími til að byrja aftur. Takmark mitt breytist ekkert, ég fer út á völlinn til að vinna og það verður gaman að fá adrenalínflæðið af stað á ný," sagði Bandaríkjamaðurinn.