Martin Jol: Betra en hjá Spurs

Hollenski þjálfarinn Martin Jol hjá Hamburg var að vonum kátur eftir að hans menn sendu milljónamæringana í Manchester City út úr Uefa keppninni í kvöld og tryggðu sér sæti í undanúrslitum.

"Þetta er ótrúleg reynsla fyrir liðið okkar og mér finnst við eiga skilið að fara áfram, ekki síst vegna þess að við áttum fyrri leikinn," sagði Jol, sem áður stýrði liði Tottenham á Englandi.

"Ég komst í átta liða úrslitin með Tottenham en nú erum við komnir skrefinu lengra. Það eru góð tíðindi og svo erum við líka komnir í undanúrslit í þýsku bikarkeppninni," sagði Jol.

Hamburg mætir löndum sínum í Werder Bremen í næstu umferð keppninnar. "Þeir eru líklega sigurstranglegri í þeirri rimmu, en við erum með hæfileikaríkt lið," sagði Jol.