Besta skíðafólk landsins á leiðinni til Ástralíu og Nýja Sjálands

Landsliðsfólk Íslands á skíðum er á leiðinni til æfinga og keppni til Ástralíu og Nýja Sjálands og er þetta í fjórða sinn sem besta skíðafólk Íslands fer hinum megin á hnöttinn til að finna gott skíðafæri.

Liðið fer þann 5. ágúst og verður við æfingar og keppni til 17. september. Aðstæður eru mjög góðar bæði í Ástralíu og á Nýja Sjálandi. Íslenska landsliðsfólkið leggur á sig þessa löngu og dýru ferð þrátt fyrir kreppu en þau hafa lagt mikinn tíma og peninga undanfarin ár til þess að undirbúa sig sem best fyrir Ólympíuleikana í Vancouver á næsta ári.

Að þessu sinni verður farið viku fyrr en áður til að ná fleiri skíðadögum áður en keppni hefst en okkar keppendur mun taka þátt í álfukeppni í ár eins og undanfarin ár.

Þau sem fara til Ástralíu og Nýja Sjálands eru Björgvin Björgvinsson frá Dalvík, Stefán Jón Sigurgeirsson frá Húsavík, Árni Þorvaldsson úr Ármanni og Katrín Kristjánsdóttir úr SKA.

Þeir Gísli Rafn Guðmundsson úr Ármanni og Sigurgeir Halldórsson úr SKA fara ekki í þessa ferð. Gísli er að ná sér af meiðslum sem hann hlaut á heimsmeistaramóti í Frakklandi þar sem hann sleit krossband og Sigurgeir brákaði hryggjarlið á voræfingum.

Katrín Kristjánsdóttir úr SKA fer með karlalandslið en hinar landsliðsstelpurnar, María Guðmundsóttir SKA og Íris Guðmundsóttir SKA, eru nú við æfingar á jökli í Noregi. Katrín mun einnig æfa og keppa í vetur í Noregi en allar eru þær í skíðamenntaskólanum í Geilo.