Nýtt met á Mastersmótinu - Kim var með ellefu fugla í dag

Anthony Kim setti nýtt met á Mastersmótinu þegar hann náði ellefu fuglum á öðrum hring á Augusta-vellinum í dag. Kim bætti 23 ára gamalt met Nick Price sem náði tíu fuglum árið 1986.

Kim byrjaði mótið ekki vel og lék fyrsta hringinn á 75 höggum. Hann lék tíu höggum betur í dag sem þýðir að hann er kominn á fjögur högg undir par og er fimm höggum á eftir efstu mönnum.

„Ég veit í rauninni ekki hvað gerðist. Pútterinn minn hitnaði og ég fékk meira sjálfstraust með hverju höggi. Ég setti niður nokkur stór pútt," sagði hinn 23 ára Kim kátur.

Hringurinn var litríkur því Kim fékk einnig tvo skolla og einn skramba á 10. holu. Kim fékk fugla á holum 1, 3, 5-8, 12-15 og 18.