Tennis-systurnar Venus og Serena Williams hafa ákveðið að fjárfesta í hlut í NFL-liðinu Miami Dolphins. Ekki er búið að ganga frá kaupunum en samkomulag er næstum í höfn.
Systurnar búa báðar í Flórída og það aðeins einum klukkutíma frá heimavelli Dolphins, Dolphins Stadium.
Þær verða fyrstu þeldökku einstaklingarnir sem eiga stóran hlut í NFL-liði.
Stjörnurnar hafa keppst um að kaupa í Dolphins síðustu mánuði. Gloria og Emilio keyptu í félaginu sem og söngvarinn Marc Anthony. Annar söngvari, Jimmy Buffett, á einnig í félaginu.
