Óvissa með bandaríska björgunarhringinn

Hlutabréfavísitölur enduðu beggja vegna núllsins á fjármálamörkuðum vestanhafs í dag en fjárfestar eru enn tvístígandi hvort bandarískir þingmenn muni samþykkja björgunaráætlun bandarískra stjórnvalda. Þeir Ben Bernanke, seðlabankastjóri Bandaríkjanna, Henry Paulson, fjármálaráðherra, og Christopher Cox, forstjóri bandaríska fjármálaeftirlitsins, vitnuðu fyrir efnahagsmálanefnd þingsins í dag og reyndu að sannfæra hana um ágæti þess að styðja björgunaraðgerðirnar sem kosta muni bandaríska skattgreiðendur 700 milljarða bandaríkjadala. Vitnaleiðslurnar voru á svipuðum nótum í dag og þegar þeir sátu fyrir svörum bandarísku bankamálanefndarinnar í gær. Bernanke lagði áherslu á samstöðu þingsins um aðgerðirnar en Paulson lagði ríkari áherslu á mikilvægi þeirra fyrir bandarískt efnahagslíf. Þá bætir Bloomberg-fréttastofan því við að Paulson hafi samþykkt að skoðað verði að setja þak á árangurtengd laun og bónusgreiðslur til forstjóra fjármálafyrirtækja, sem sum hver hafi lent í kröggum. Björgunaraðgerðirnar hafa sett mark sitt á kosningabaráttuna vestanhafs í dag. John McCain, forsetaefni Repúblíkana, lýsti því yfir í dag að hann telji ólíklegt að aðgerðirnar hljóti brautargengi fyrir þingheimi í óbreyttri mynd. Hefur hann boðist til að gera hlé á kosningabaráttu sinni tímabundið á meðan lausna er leitað. Þá hafa Demókratar enn fremur lýst yfir efasemdum um tillögurnar og vilja setja þeim þrengri skorður en fyrstu drög hafa hljóðað upp á. Eins og björgunaraðgerðirnar líta út í dag munu stjórnvöld vestra setja á laggirnar sérstakan sjóð sem muni taka við öllum undirmálslánum og öðrum skuldavafningum sem brennt hafa gat í efnahagsreikning bandarískra fjármálafyrirtækja. Ríkið kaupir bréfin en selur þau svo aftur í nánustu framtíð, eða þegar verðgildi þeirra hefur aukist á ný, líkt og breska ríkisútvarpið greinir frá í dag. Það ætti í besta falli að skila ríkinu hagnaði af viðskiptunum þegar upp er staðið. George W. Bush, forseti Bandaríkjanna og flokksbróðir McCains, er hins vegar á annarri skoðun en forsetaframbjóðendurnir en í sjónvarpsávarpi sínu í dag reyndi hann að telja löndum sínum trú um að ágæti aðgerðanna. Dow Jones-hlutabréfavísitalan lækkaði um 0,27 prósent en Nasdaq-vísitalan hækkaði um 0,11 prósent.