Brown: Alls ekki búið

Wes Brown, varnarmaður Manchester United, segir að liðið megi ekki taka fótinn af bensíngjöfinni þegar liðið mætir Roma á morgun. United vann fyrri leikinn á Ítalíu 2-0 og eru því í ansi vænlegri stöðu.

„Ég held að fyrsta markið hafi mikið að segja og vonandi verður það okkar. Við munum nálgast þennan leik eins og hvern annan þrátt fyrir að vera með þessa forystu," sagði Brown.

Þá varaði Brown við því að Roma sé enn í hefndarhug eftir 7-1 sigur United á síðasta tímabili. „Þeir eru alls ekki búnir að gefast upp og enginn þeirra hefur gleymt 7-1 leiknum frá því í fyrra."