Ferguson: Frábær úrslit

Alex Ferguson, stjóri Manchester United, var vitanlega hæstánægður með sigur sinna manna gegn Roma í Meistaradeild Evrópu í kvöld.

United vann 2-0 sigur með mörkum Cristiano Ronaldo og Wayne Rooney í sínum hvorum hálfleiknum.

„Við vorum heppnir í seinni hálfleik þar sem þeir hefðu vel getað skorað. En við náðum að halda hreinu sem var afar mikilvægt. Þetta eru frábær úrslit og er ég afar ánægður," sagði Ferguson.

Eina áhyggjuefnið fyrir Ferguson voru meiðsli Nemanja Vidic en hann meiddist í leiknum. Ekki er vitað hversu alvarleg meiðslin eru.