KR með öruggan sigur á Keflavík

KR vann dýrmætan sigur á toppliði Keflavíkur í Iceland Express-deildar karla í körfubolta í kvöld, 80-69.

Einn annar leikur fór fram í deildinni í kvöld en í honum unnu ÍR-ingar stórsigur á Fjölni í Grafarvorginum, 112-67.

KR var með yfirhöndina allan leikinn en staðan í hálfleik var 37-29. KR-ingar náðu svo að auka muninn í fimmtán stig í þriðja leikhluta en munurinn var ellefu stig þegar fjórði leikhluti hófst, 60-49. KR-ingar héldu svo fengnum hlut í lokaleikhlutanum og innbyrtu að lokum öruggan sigur.

Það munaði miklu fyrir Keflavík að Bandaríkjamennirnir BA Walker og Tommy Johnson náðu sér ekki á strik en hvorugur komst á blað í fyrri hálfleik. Johnson skoraði fimmtán stig í leiknum og Walker tólf.

Joshua Helm var stigahæstur hjá KR með átján stig en hann tók þar að auki fimmtán fráköst. JJ Sola skoraði fjórtán stig.

Keflavík og KR eru nú jöfn að stigum á toppi deildarinnar með 28 stig en Keflvíkingar halda toppsætinu þar sem þeir eru með betri árangur í innbyrðis viðureignum liðanna.

Grindavík er í þriðja sæti með 26 stig og Skallagrímur í því fjórða með 20 stig.

ÍR-ingar komu sér upp í fjórtán stig með sigrinum í kvöld og deila 7.-8. sætinu með Þórsurum.