Ómótstæðileg jólakort

Súkkulaðijólakort að hætti súkku­laðimeistarans Hafliða Ragnarssonar í Mosfellsbakaríi eru skemmtileg tilbrigði við hefðbundin jólakort.

Hafliði prentar kveðju og ljósmynd á sérstaka filmu sem hann bræðir á hvíta súkkulaðiplötu. Hann notar til þess sérstaka súkkulaðiliti og er platan því fullkomlega æt. „Það er svo bara spurning hvort fólk tími að borða ættingja og vini,“ segir hann og hlær. „Platan geymist þó vel við stofuhita og því engin ástæða til að gleypa hana í einum bita.“

Kveðjan er öðru megin á plötunni en hina hliðina bragðbætir Hafliði gjarnan með súkkulaðikúlum og öðru góðgæti sem gerir kortin ómótstæðileg. Þau eru yfirleitt gerð í hefðbundinni kortastærð en Hafliði tekur þó við sérpöntunum hafi fólk aðrar hugmyndir. Hann segir kortin sniðug við hin ýmsu tækifæri og að í fyrra hafi þau til að mynda verið notuð sem boðskort í jólaboð. Þá kaupa einstaklingar þau í auknum mæli til að gleðja ættingja og vini með óvæntum hætti.

Hafliði býður upp á fleira jólagóðgæti og má þar nefna dísætt jólapúsl. Það er úr mjólkursúkkulaði og skreytt gamaldags jólamyndum. Til eru hinar ýmsu útgáfur sem ættu að geta glatt unga sem aldna. vera@frettabladid.is