Hermann og félagar fengu AC Milan

Dregið var í riðlakepppni UEFA-bikarkeppninnar í dag og lentu Hermann Hreiðarsson og félagar í Portsmouth í riðli með ítölsku risunum í AC Milan.

Margar stórstjörnur leika með AC Milan, eins og Ronaldinho, Kaka, Paolo Maldini, Andrea Pirlo og Filippo Inzaghe. Þetta er í fyrsta sinn sem Portsmouth tekur þátt í Evrópukeppninni og fá þeir verðugt verkefni í eldskírn sinni.

Hollenska liðið Heerenveen, lið Arnórs Smárasonar, er í sama riðli og er því möguleiki að Hermann og Arnór mætist á vellinum þó svo að þeir hafi fá tækifæri fengið í aðalliði sinna félaga að undanförnu.

Þriðja Íslendingaliðið, FC Twente, lenti í afar erfiðum riðli - með Manchester City, Schalke, PSG og Racing Santander. Bjarni Þór Viðarsson leikur með Twente en hefur reyndar átt við erfið meiðsli að stríða.

Tottenham slapp ágætlega frá drættinum en Aston Villa fékk heldur erfiðari riðil.

Dregið var í átta fimm liða riðla í dag og komast þrjú efstu liðin í hverjum riðli áfram í 32-liða úrslitin sem verða leikin með útsláttarfyrirkomulagi.

Auk liðanna 24 úr riðlakeppninni komast þau átta lið sem urðu í þriðja sæti sinna riðla í Meistaradeild Evrópu einnig í 32-liða úrslitin.

Riðlarnir:

A-riðill

Schalke (Þýskalandi)

PSG (Frakklandi)

Manchester City (Englandi)

Racing Santander (Spáni)

FC Twente (Hollandi)

B-riðill

Benfica (Portúgal)

Olympiakos (Grikklandi)

Galatasaray (Tyrklandi)

Hertha Berlín (Þýskalandi)

Metalist Kharkiv (Úkraínu)

C-riðill

Sevilla (Spáni)

Stuttgart (Þýskalandi)

Sampdoria (Ítalíu)

Partizan Belgrad (Serbíu)

Standard Liege (Belgíu)



D-riðill

Tottenham (Englandi)

Spartak Moskva (Rússlandi)

Udinese (Ítalíu)

Dinamo Zagreb (Króatíu)

NEC Nijmegen (Hollandi)

E-riðill

AC Milan (Ítalíu)

Heerenveen (Hollandi)

Braga (Portúgal)

Portsmouth (Englandi)

Wolfsburg (Þýskalandi)

F-riðill

Hamburger SV (Þýskalandi)

Ajax (Hollandi)

Slavia Prag (Tékklandi)

Aston Villa (Englandi)

MSK Ziline (Slóvakíu)



G-riðill

Valencia (Spáni)

Club Brugge (Belgíu)

Rosenborg (Noregi)

FC Kaupmannahöfn (Danmörku)

Saint-Etienne (Frakklandi)

H-riðill

CSKA Moskva (Rússlandi)

Deportivo La Coruna (Spáni)

Feyenoord (Hollandi)

AS Nancy (Frakklandi)

Lech Poznan (Póllandi)