Koma Ronaldo gæti valdið usla í hópi Real Madrid

Wesley Sneijder, leikmaður Real Madrid, telur að ef Cristiano Ronaldo verði keyptur til félagsins gæti það valdið óróa í leikmannahópnum. Nokkrir leikmenn myndu ekki sætta sig við að fá mun lægri launatölur en sá portúgalski.

„Það myndi ekki hafa nein áhrif á mig en ég veit um leikmenn sem yrðu ekki sáttir. Það hefur slæm áhrif á lið ef einn leikmaður er með miklu hærri laun en hinir," sagði Sneijder.

Hann vildi þó ekki tjá sig nánar um Ronaldo. „Maður er alltaf að lesa mismunandi fréttir um þetta mál. Ég tel ekki rétt á þessu stigi að ræða um hann meðan hann er ekki orðinn leikmaður Real Madrid."

Sneijder vill halda Robinho hjá félaginu en sá brasilíski hefur verið orðaður við ýmis lið. Hann segir að Robinho sé að sínu mati í sama klassa og Ronaldo.