Stýrivaxtadagur er á evrusvæðinu og í Bretlandi á morgun. Sérfræðingar reikna flestir með óbreyttu vaxtastigi þrátt fyrir svartsýnar efnahagshorfur á næstunni.
Stýrivextir á evrusvæðinu standa í 4,25 prósentum en í Bretlandi í fimm prósentum.
Breska ríkisútvarpið segir menn tvístígandi innandyra hjá Englandsbanka enda aðstæður í bresku efnahagslífi afar slæmar í kjölfar alþjóðlegrar lánsfjárkreppu og verðhruns á fasteignamarkaði. Þá er atvinnuleysi í hæstu hæðum auk þess sem verðbólga mælist 4,4 prósent.
Haft hefur verið eftir Alistair Darling, fjármálaráðherra Bretlands, að aðstæður sé þær verstu í 60 ár.
Þrátt fyrir verðbólguna telja menn að Englandsbanki grípi í taumana til að koma í veg fyrir að samdráttarskeið gangi yfir og lækki stýrivexti fyrir árslok til að koma hjólum efnahagslífsins í gang. Því er sömuleiðis spáð að til að koma í veg fyrir að svartsýnisspár gangi eftir verði vaxtastigið keyrt niður í 3,5 prósent á næsta ári. Líkurnar á því aukast raunar eftir því sem olíu- og matvöruverð lækki.
