Manchester United í úrslit

Það er ljóst að það verða tvö ensk lið sem leika til úrslita í Meistaradeild Evrópu. Manchester United tryggði sér í kvöld sæti í úrslitaleiknum með 1-0 sigri á Barcelona í fjörugum leik á Old Trafford.

Fyrri leik liðanna á Spáni lauk með markalausum jafntefli en það tók gamla refinn Paul Scholes ekki nema rúmar þrettán mínútur að skora í leiknum í kvöld.

Þrumufleygur hans efst í markhornið reyndist nóg til að tryggja enska liðinu sigur og verðskuldaðan farseðil í úrslitaleikinn í Moskvu. Þetta var fyrsta mark Scholes fyrir United í átta mánuði og það hefði ekki geta komið á betri tíma.

Barcelona byrjaði leikinn með miklum látum og var með undirtökin þar til Scholes skoraði markið glæsilega.

Bæði lið fengu aragrúa færa í leiknum, en tókst ekki að nýta þau. Þar af sóttu Börsungar eðlilega án afláts síðustu tíu mínútur leiksins, en gríðarleg pressa þeirra nægði ekki til að koma boltanum í netið.

Eiður Smári Guðjohnsen var á varamannabekknum hjá Barcelona og fékk að koma inn á 88. mínútu.